2023 жылдың 3 ақпанында облыс орталығының «Болашақ» тұрғын ауданында орналасқан Отбасылық медицина орталығында 2022 жылы атқарылған жұмыс қорытындысы туралы есеп беру жиналысы өткізілді

2023 жылдың 3 ақпанында облыс орталығының «Болашақ» тұрғын ауданында орналасқан Отбасылық медицина орталығында 2022 жылы атқарылған жұмыс қорытындысы туралы есеп беру жиналысы өткізіліп, жиынға облыстық денсаулық сақтау басқармасының бас маманы Қ.Райжанов және осы ауданның белсенді тұрғындары қатысты.

Жиында емхананың бас дәрігері С.Даньяров өткен жылы Орталыққа тіркелген қала тұрғындары арасындағы демографиялық көрсеткіштер мен азаматтардың денсаулық индексі жақсарғаны жөнінде ауқымды мәлімет берді.

Отбасылық медицина орталығына тіркелген 16317 тұрғын арасында еңбек жасындағы азаматтар мен жастар қоныстануына байланысты, туылу көрсеткіші орташа облыс көрсеткішінен жоғары болса, өлім-жітім көрсеткіші жалпы деңгейден едәуір төмен екені атап өтілді. Соңғы жылдары тұрғындарға ыңғайлы, қол жетімді жерде орналасқан емхананы кадрлармен қамтамасыз ету ісі жолға қойылып, олардың біліктілігін арттыру ісі жақсарған. Емханада қызмет атқаратын 43 дәрігердің 37,2%-ның жоғарғы және бірінші дәрежелі санаты болса, 72 мейіргердің 37,5%-ның біліктілік санаты бар. Бұл тұрғындарға тегін көрсетілетін медициналық қызметтің сапасын арттыратыны сөзсіз. Өткен жылы Орталық тұрғындар денсаулығын қорғауға аса қажетті ультрадыбысты зерттеу сканнері, физиотерапия аппараттарымен, сондай-ақ биохимиялық және гематологиялық анализаторлармен, жаңа санитарлық автокөлікпен жарақталды. Биылғы жылы офтальмология бөлмесін диагностикалық құралдармен жабдықтау жоспарланған.
Өткен жылдың желтоқсан айында отбысылық медицина орталығы Ұлттық тәуелсіз аккредитациялау орталығының сарапшыларымен жан жақты зерттеліп, нәтижесінде аккредитеттеудің екінші санатына ие болды.
Дегенмен мамандарды тұрғындар арасында туберкулез дертімен ауыру деңгейі, және онкологиялық дерттердің асқынған түрі тіркелуі алаңдатып отыр. Осыған қоса тіркеудегі 5254 баланың ішінде - 32 баланың ата аналары профилактикалық екпеден бас тартуы да өзекті мәселе. Емханада 2017 жылы екпе алмаған 53 бала тіркелсе 2022 жылы 32 бала, оның ішінде туғалы мүлдем екпе алмаған балалар саны 27 болып отыр. Осыған байланысты, балалардың ата анасы, ата әжелерімен, сондай ақ мектеп пен балабақша, қоғамдық ұйымдардың қатысуымен қосымша шаралар алыну жоспарланды.
Жиын соңында 2023 жылға межеленген төмендегі негізгі шаралар атап өтілді:

• Ана мен бала денсаулығын қорғау ісіне қосымша ішкі резервтерді пайдалану арқылы аурушаңдық пен өлім-жітімге жол бермеу,
• Емхананың материалдық техникалық негізін нығайту,
• Азаматтардан түсетін арыз-шағымдарды азайту мақсатында медицина қызметкерлерінің коммунативтік дағдыларын арттыру және кәсіби білімін жетілдіру,
• Эпидемиологиялық жағдайды ескере отырып тұрғындарды ковид-19 және маусымдық грипп инфекциясына қарсы егу,
• Әлеуметтік маңызы бар науқастармен аурушаңдық көрсеткішін төмендету,
• Тұрғындарды тегін берілетін сапалы дәрі-дәрмекпен жыл бойы үздіксіз қамтамасыз ету.

Жалпы кәсіпорын 2022 жылдың қорытындысымен Денсаулық сақтауды 2020-2025 жылдары дамыту мемлекеттік бағдарламасында межеленген нысаналы индикаторлардың барлығына қол жеткізегіні атап айтылды.